Óskemende referendým kúni qoǵamdyq kólik tegin bolady

ÓSKEMEN. KAZINFORM — Óskemen qalasynyń turǵyndary 15 naýryzdaǵy referendým kúni qoǵamdyq kólikte tegin júre alady. 

Qala ákimdiginiń málimetine súıensek, buǵan tasymaldaýshy kompanııalardyń ózderi bastamashy bolǵan. 

— Bul kúni barlyq jolaýshylar avtobýstarda tegin qatynaı alady. Osyndaı sheshim aldaǵy saıası oqıǵanyń mańyzdylyǵyn eskere otyryp qabyldandy jáne saılaý ýchaskelerine barýdy josparlap otyrǵan turǵyndar úshin qolaıly jaǵdaı jasaýǵa baǵyttalǵan, — deıdi tasymaldaýshylar.

Osylaısha, óskemendikter azamattyq ustanymyn bildirý úshin qalanyń kez kelgen bóligindegi saılaý ýchaskelerine esh aqysyz jete alady. Sondyqtan jolaýshylarǵa avtobýstyń tólem kartasyn ózderimen alyp júrmeýge de bolady.

Eske salsaq, osyǵan deıin elimizdiń jańa Konstıtýtsııasyn qabyldaýǵa arnalǵan respýblıkalyq referendým ótetin kúni Qyzylorda qalasynda qoǵamdyq kólikter halyqqa tegin qyzmet kórsetetindigi jaıly jazǵanbyz.