Óskemende iri kólemdegi marıhýana satpaq bolǵan kúdikti ustaldy
ASTANA. KAZINFORM – Shyǵys Qazaqstan oblysynda polıtseıler esirtkiniń zańsyz aınalymyna tosqaýyl qoıdy.
Jedel-izdestirý is-sharalary barysynda esirtki qylmysyna qatysy bar degen kúdikke ilingen azamat ustalyp, zańsyz aınalymnan iri kólemdegi marıhýana tárkilendi. Nátıjesinde óńir aýmaǵynda esirtki zattarynyń taralý arnasy toqtatyldy.
«Qarasora — 2026» jedel-profılaktıkalyq sharasy aıasynda polıtsııa qyzmetkerlerine esirtki zattaryn zańsyz ótkizý faktisi týraly aqparat kelip túsken. Jedel ýákilderdiń baqylaýymen kúdikti satýshymen hat almasý júrgizilip, esirtki satyp alý jóninde kelisim jasaldy.
Tyıym salynǵan zatty berý kezinde kúdikti qylmys ústinde ustaldy. Ol Óskemen qalasynyń 49 jastaǵy turǵyny bolyp shyqty.
Turǵylyqty jerin tintý jáne tekserý barysynda polıtseıler birneshe iri kólemdegi esirtki zattaryn tapqan. Olar polımer paketterge salynyp, ári qaraı taratýǵa daıyndalǵany anyqtaldy. Saraptama qorytyndysyna sáıkes, tárkilengen zat marıhýana bolyp shyqty. Onyń jalpy salmaǵy 2,8 keliden asty.
Sonymen qatar polıtseılermen bir mıllıon teńgeden astam qolma-qol aqsha tárkilendi. Qazirgi ýaqytta atalǵan fakti boıynsha sotqa deıingi tergep-tekserý júrgizilýde. Kúdikti ýaqytsha ustaý ızolıatoryna qamaldy. Polıtsııa esirtkiniń zańsyz aınalymy qoǵamǵa úlken qaýip tóndiretinin jáne Qazaqstan Respýblıkasynyń zańnamasynda kózdelgen qylmystyq jaýapkershilikke ákep soǵatynyn eskertedi.
Aıta ketelik esirtkiden túsken 2,6 mlrd teńge zańsyz kiriske tosqaýyl qoıylǵan edi.
