Óskemende iri kólemde psıhotroptyq zattar saýdalaǵan eki adam ustaldy

ShQO Polıtsııa departamenti esirtki qylmysyna qarsy is-qımyl basqarmasynyń qyzmetkerleri psıhotroptyq zattardyń zańsyz aınalymyna qatysy bar degen kúdikpen eki jigitti ustady.

— Ustalǵandardyń biri shilde aıynda ınternet arqyly jumys tapqan. Ol tyıym salynǵan zattardy alyp, olardy ólshep, býyp-túıýmen baılanysty bolǵan. Sol úshin oǵan krıptovalıýta túrinde aqy tólenip, keıin ony bank shottary arqyly qolma-qol aqshaǵa aınaldyryp otyrǵan, — dep habarlady departamenttiń baspasóz qyzmetinen.

Tintý barysynda polıtseıler tórt plastık ydys pen untaq tárizdi zat salynǵan zıp-paketti, ızolenta jáne úsh elektrondy tarazyny tárkiledi.

Saraptama qorytyndysyna sáıkes, shamamen 800 gramm α-PVP jáne 334 gramm mefedron anyqtalǵan. Psıhotroptyq zattardyń jalpy salmaǵy 1 keliden asty.

Atalǵan fakti boıynsha qylmystyq is qozǵaldy. Kúdiktiler ýaqytsha ustaý ızolıatoryna qamaldy.

Eske salsaq, osyǵan deıin Petropavlda júzý jattyqtyrýshysy esirtki aınalymyna qatysy bar degen kúdikke ilikkeni habarlanǵan.