Óskemende iri esirtki qoımasy anyqtalyp, 100 kelige jýyq marıhýana tárkilendi
ÓSKEMEN. KAZINFORM — Óskemen qalasynda iri kólemdegi esirtki zattary saqtalǵan qoıma anyqtaldy.
ShQO polıtsııa departamenti baspasóz qyzmetiniń málimetine súıensek, jedel izdestirý sharalarynyń nátıjesinde esirtki quraldarynyń zańsyz aınalymyna qatysy bar 27 jastaǵy qala turǵyny ustaldy.
— Tintý barysynda onyń garajynan naǵyz esirtki qoımasy tabyldy. Onyń ishinde ósimdik tektes zat salynǵan eki qorap, kólemi 120 lıtr bolatyn jartylaı toltyrylǵan alty plastık bóshke jáne býyp-túıýge arnalǵan materıaldar tárkilendi. Saraptama qorytyndysyna sáıkes, tárkilengen zat jalpy salmaǵy 93 keliden asatyn «keptirilgen marıhýana» bolyp shyqty. Bul asa iri mólsher bolyp sanalady, — delingen aqparatta.
Qazirgi ýaqytta kúdikti ýaqytsha ustaý ızolıatoryna qamaldy.
Osy rette, tártip saqshylary esirtki quraldarynyń zańsyz aınalymyna qatysy bar adam múlki tárkilene otyryp, 7-den 12 jylǵa deıin bas bostandyǵynan aıyrylýy múmkin ekendigin eskertti.
Eske salsaq, buǵan deıin Óskemenge Almatydan kelip, esirtki saýdalaǵan kýrer ustalǵany habarlanǵan.
