Óskemende prokýratýranyń aralasýynan keıin ǵana 2800-den astam balaǵa skrınıng jasaldy

ÓSKEMEN. QazAqparat – Óskemen qalasyndaǵy úsh emhananyń 2800-den astam balaǵa skrınıng jasamaǵany anyqtaldy, dep habarlaıdy QazAqparat tilshisi.

Óskemen qalasy prokýratýrasynyń málimetine súıensek, emhanalardyń oqýshylardy mindetti medıtsınalyq tekserýden ótkizýi barysynda zańdylyqtyń saqtalýyna taldaý júrgizdi. Sonyń nátıjesinde, birqatar buzýshylyq anyqtalǵan.

«Zań boıynsha medıtsınalyq mekemeler balalardy aýdıologııalyq tekserýden ótkizýge mindetti. Bul skrınıngtiń ýaqytyly júrgizilýi balalardyń estý músheleriniń aýrýlaryn erte kezeńde anyqtaýǵa múmkindik beredi. Alaıda qaladaǵy úsh medıtsınalyq uıymnyń 2823 balany osyndaı skrınıngten ótkizbegeni belgili boldy», - delingen aqparatta.

Prokýratýra qyzmetkerleri birden tıisti sharalardy qabyldaǵan soń olqylyqtyń orny tolyqtyryldy. Qazirgi ýaqytta balalar túgeldeı skrınıngtik tekserýden ótti.