Óskemende probatsııalyq esepte turǵan er adam baqylaý bilezigin sheshkeni úshin túrmege qamaldy

ÓSKEMEN. QazAqparat – Óskemen qalasynda probatsııalyq esepte turǵan er adam baqylaý bilezigin sheshkeni úshin túrmege qamaldy, dep habarlaıdy QazAqparat tilshisi.

ShQO boıynsha QAJ departamenti baspasóz qyzmetiniń málimetine súıensek, er adam 2 jyl boıy probatsııalyq esepte turǵan. Onyń jazasyn óteýine eki aı ǵana qalǵan edi. Alaıda ol baqylaýdan jasyryný úshin elektrondy baqylaý bilezigin sheship tastaǵan.

«Sol jaǵalaý aýdanyndaǵy probatsııa qyzmetiniń mamandary probatsııalyq baqylaýdy buzǵan jaǵdaıda jaýapkershilikke tartylatyndyǵy týraly er adamǵa buǵan deıin birneshe ret eskertken. Biraq 52 jastaǵy azamat eskertýdi elemedi. Oǵan qatysty aryz sotqa joldanyp, bas bostandyǵyn shekteý jazasy bas bostandyǵynan aıyrýǵa aýystyryldy», - delingen aqparatta.

Endi óskemendik jazasynyń qalǵan merzimin túrmede ótkizedi.

Aıta keteıik, Shyǵys Qazaqstan oblysynda bıyldan bastap elektrondy baqylaý bilezikteri qoldanylyp jatyr. Osyndaı bilezikter óńir boıynsha 400 adamǵa taǵylǵan.