Óskemende polıtsııa qatarynda qyzmet etetin egizder: Birimiz aýyrsaq ekinshisi de syrqattanady
ÓSKEMEN. KAZINFORM – On bes jyldan astam ýaqyt boıy tártip kúzetinde júrgen egizder Óskemen qalasynda turady. Nurlan, Erlan Qurmanǵalıevter qalalyq polıtsııa basqarmasynyń qyzmet ınspektory, polıtsııa aǵa leıtenanty. Ekeýi de úılengen. Nurlan da, Erlan da eki ul, bir qyz tárbıelep otyr. Bul da ómirdiń ózgeshe bir qubylysy.
Egizder Shyǵys Qazaqstan oblysy Katonqaraǵaı aýdany Aqmaral aýylynda dúnıege kelgen. Ekeýi de bala kúnnen tártip saqshysy bolýdy qalaǵan. Nurlan sporttyń birneshe túrimen aınalysyp, onyń ishinde voleıbol men tennıske beıimdigi baıqalsa, Erlan da sporttan qara jaıaý bolmaı, shynyqqan shymyr jigit bolyp ósti.
«Aqqaınar orta mektebinde 9-shy synypqa deıin oqyp, odan keıin 2002-2005 jyldary Úlken Naryn aýdanyndaǵy aýyl sharýashylyǵy tehnıkalyq ýchılışesinde bilim aldyq. 2007 jylǵa deıin Shyǵys Qazaqstan zań kolledjinde oqyp, sosyn bir jyl Otan aldyndaǵy boryshymyzdy ótedik. Kelgen boıda Óskemen qalalyq polıtsııa basqarmasynda patrýldi-bekettik qyzmet qataryn tolyqtyrdyq», – deıdi Nurlan Qurmanǵalıev.
Egizderdi ata-analary árkez qoldaıdy. Maqsattaryn túsinip, osy mamandyqqa kishkentaılarynan baýlyǵan. Bir qyzyǵy, ekeýi egiz bolsa da bir-birine onsha uqsaı qoımaıdy. Sonda da keı adamdar olardy shatastyryp jatady eken.
«Bala kúnimizden tańmen talasa turyp, júgirip, jattyǵý jasaıtynbyz. Áskerden oralǵan boıda qaýyrt jumysqa kiristik te kettik. Ózge mamandyqtardaǵydaı bizdiń qyzmet te asqan jaýapkershilikti qajet etedi. Halyq pen memlekettiń qaýipsizdigin saqtap, qylmyspen kúresý minez ben jınaqylyqty qajet etedi», – deıdi egizder.
Erlan men Nurlan Qurmanǵalıev ómirge kelgende aralaryn nebári bes mınýt bólgen. Úlkeni – Nurlan. Ol tez ashýlanyp, tez qaıtady eken. Al egizi – salmaqty, tuıyqtaý. Basqa túsken ár máseleni ekeýara aqyldasa otyryp sheshedi.
«Bir-birimizdi kóp kórmesek kóńil-kúıimiz bolmaıdy. Anamnyń aıtýynsha, birimiz aýyrsaq, ekinshisi de syrqattanyp qalatyn. Ekeýimizdiń bir salada jumys isteıtinimizdiń kemshiligi – jubymyz jazylmaıtyndyqtan ata-anamyzǵa baryp, qolǵabys ete almaı qalamyz», – deıdi Erlan Qurmanǵalıev.
Shyǵys Qazaqstan oblysyndaǵy barlyq egizder arasynda tártip saqshysy bolyp júrgen tek osy Qurmanǵalıevter. Ekeýinde uqsastyq kóp desek te, talǵamdary ár túrli.
«Syńarym sporttyq kıimder kıgendi unatady, al men kóbinese kostıým-shalbar kıemin. Maǵan kıno kórgen unaıdy, egizim ol jaǵyna joq. Biraq ekeýimiz de tamaq talǵamaımyz», – deıdi Erlan.
Qurmanǵalıevter búginde Óskemen qalalyq polıtsııa basqarmasynyń qyzmet ınspektory, polıtsııa aǵa leıtenanty. Úılengen egizderdiń ekeýi de eki ul, bir qyz tárbıelep otyr. Bul da ómirdiń ózgeshe bir qubylysy.
