Óskemende «polıtsııa bólimshesine bomba qoıdym» dep ázildegen áıel ustaldy

ÓSKEMEN. KAZINFORM — Óskemen qalasynda «polıtsııa bólimshesine bomba qoıdym» dep ázildegen mas áıelge qatysty qylmystyq is qozǵaldy.

ShQO polıtsııa departamenti baspasóz qyzmetiniń málimetine súıensek, «102» jedel arnasyna habarlasqan áıel adam polıtsııa bólimsheleriniń birine jarylǵysh zat qoıǵanyn aıtqan. 

Arnaıy qyzmet pen tártip saqshylary ǵımaratty muqııat tekserip shyqty. Alaıda jarylǵysh nemese basqa da kúmándi zattar tabylmady.

— Kóp uzamaı polıtsııaǵa qońyraý shalǵan adamnyń kim ekeni anyqtaldy. Ol qalanyń 32 jastaǵy turǵyny bolyp shyqqan. Áıel qońyraý shalǵan kezde polıtsııa bólimshesine jaqyn mańda júrgen jáne mas kúıde bolǵan, — delingen aqparatta.

Ustalǵan áıelge qatysty «Terrorızm aktisi týraly kórineý jalǵan habarlama berý» baby boıynsha qylmystyq is qozǵaldy. Ol 5000 AEK-ke deıin aıyppul tóleýge mindettelip nemese 5 jylǵa deıin bas bostandyǵynan aıyrylýy múmkin.

Eske salsaq, osyǵan deıin Almaty oblysynda zańsyz qarý men iri kólemde esirtki tárkilengeni habarlanǵan.