Óskemende polıtseıler qyzmettik emes kólikpen jasyryn kamera arqyly patrýldeýdi jalǵastyra ma

ÓSKEMEN. KAZINFORM — Óskemen qalasynda tártip saqshylary joldardy qyzmettik emes kólikpen jasyryn kamera arqyly patrýldeı bastaǵan bolatyn. Kazinform tilshisi bul jobanyń ary qaraı jalǵasatyn-jalǵaspaıtynyn bilip kórdi.

Júrgizýshiler áli jaýapqa tartylmady

Óskemende 1 aqpannan bastap synaq rejıminde kóshe patrýldeýdiń jańa ádisine kóshken polıtseıler jumysqa qyzmettik emes kólikpen shyqqan. 

Kóliktiń aldyńǵy oryndyǵyna robotqa uqsaıtyn, jol qozǵalysy erejelerin buzý faktilerin tirkeıtin avtomatty júıe ornatyldy. Jasyryn patrýldeý arqyly jol-kólik oqıǵalarynyń sany azaıady dep josparlanǵan.

— Bundaǵy basty maqsat — júrgizýshilerdiń jol erejelerin saqtaý kórsetkishin jaqsartý. Qazirgi ýaqytta jyldamdyqty arttyrǵandardy tirkeıtin bir kólik jolda júr. Dese de ereje buzǵandar tek synaq rejıminde tirkeldi. Júrgizýshiler áli jaýapkershilikke tartylǵan joq, — dep habarlady sol kezde ShQO Polıtsııa departamentinen.

Turǵyndar arasynda bul jobany qoldaıtyndaryn da, dattaıtyndar da kezdesti. Biri sonyń nátıjesinde jolda tártip kúsheıedi dese, basqalary halyqqa jappaı aıyppul salyna bastaı ma dep úreılenedi.

Joba jalǵasa ma?

Jasyryn patrýldeýdiń ary qaraı jalǵasatynyn nemese osymen toqtaıtynyn bilý úshin Kazinform tilshisi polıtsııaǵa resmı saýalhat joldady. 

— Óskemen qalasynyń aýmaǵynda synaq rejıminde «Jasyryn patrýldeý» jumysy jalǵasyp jatyr. Qazirgi ýaqytta jyldamdyqty arttyrǵan kólikterdi tirkeý qurylǵysy bar bir avtokólik kóshede júr. Birinshi toqsannyń sońyna deıin oblys boıynsha mundaı patrýlderdiń sanyn 4-ke deıin ulǵaıtý kózdelip otyr, — dep jaýap berdi Shyǵys Qazaqstan oblystyq Polıtsııa departamentiniń bastyǵy Erlan Omarbekov.

Alaıda ázirge bul jobanyń kórsetkishteri jarııa etilmedi. Kólikter sanynyń kóbeıtilip jatqanyna qaraǵanda jasyryn patrýldeý aldaǵy ýaqytta da jalǵasa beretin sekildi.

Eske salsaq, buǵan deıin jol boıyndaǵy ashanada uıyqtaǵan qos polıtseı jumystan qýylǵany habarlanǵan.