Óskemende polıtseıge shabýyl jasap, oq atqan eki er adam ustaldy

ÓSKEMEN. KAZINFORM – Óskemen qalasynda patrýldik polıtsııa qyzmetkerine qarýly shabýyl jasaý faktisi boıynsha tergeý júrgizilip jatyr. 

Oqıǵa Saǵadat Nurmaǵambetov kóshesindegi turǵyn úı aýlalarynyń birinde boldy. Patrýldik polıtsııa qyzmetkerine júgingen jasóspirim aýlada mas kúıde júrgen eki er adam týraly aıtqan. 
Tártip saqshysy quqyq buzýshylarmen betpe-bet kezdesken. Olar zańdy talaptarǵa baǵynbaı, polıtsııa qyzmetkerine shabýyl jasaǵan.

Polıtseı oq jaraqatyn alǵan. Qazirgi ýaqytta onyń jaǵdaıy turaqty dep baǵalanyp otyr. Kúdiktiler oqıǵa ornynan boı tasalaǵanymen, olardyń kim ekenderi qysqa ýaqyt ishinde anyqtaldy.

– Búginde eki er adam ýaqytsha ustaý ızolıatoryna qamaýǵa alynyp, atys qarýy tárkilendi. Óskemen qalalyq polıtsııa basqarmasy sotqa deıingi tergeý amaldaryn bastady, - dep habarlady ShQO polıtsııa departamentiniń baspasóz qyzmetinen. 

Eske salsaq, osyǵan deıin Jambyl oblysynda jyl basynan beri 2 000-nan astam jasóspirim polıtsııaǵa jetkizilgeni habarlanǵan.