Óskemende polıtseıdiń qarýyn tartyp alyp, oq atqan kúdiktiler ustaldy
ÓSKEMEN. KAZINFORM – Óskemen qalasynda polıtsııa qyzmetkeriniń qarýyn tartyp alyp, oq atqan kúdiktiler quryqtaldy.
Oqıǵa qaladaǵy turǵyn úılerdiń biriniń aýlasynda bolǵan. ShQO polıtsııa departamentiniń málimetinshe, mas kúıde bolǵan eki er adam quqyq qorǵaý organy qyzmetkeriniń talaptaryna baǵynbaı, qarsylyq kórsetken.
- Olar polıtsııa qyzmetkeriniń tabeldik qarýyn tartyp alyp, oq atqan. Sonyń saldarynan tártip saqshysynyń qoly jaralandy. Kúdiktiler jedel túrde ustalyp, ýaqytsha ustaý ızolıatoryna qamaldy. Zardap shekken qyzmetker aýrýhanaǵa jetkizildi, onyń jaǵdaıy turaqty dep baǵalanyp otyr, - dedi departament bastyǵynyń orynbasary Qazbek Takjanov.
Qazirgi ýaqytta atalǵan fakti boıynsha QR Qylmystyq kodeksiniń birneshe baby boıynsha, onyń ishinde quqyq qorǵaý organy qyzmetkeriniń ómirine qaýip tóndirý jáne qarýdy zańsyz ıelený boıynsha sotqa deıingi tergeý júrgizilip jatyr.
Eske salsaq, osyǵan deıin Qyzylorda polıtsııasy turǵyndardy velosıped urylarynan qorǵanýǵa shaqyrǵany habarlanǵan.
