Óskemende polıtseıdi óltirdi degen kúdikke ilingen er adam aýrýhanada jatyr

ShQO Densaýlyq saqtaý basqarmasy baspasóz qyzmetiniń málimetinshe, er adam mamandandyrylǵan medıtsınalyq ortalyqta emdelip jatyr.

– Naýqas neırohırýrgııa bólimshesinde qajetti em qabyldaýda. Jaǵdaıy ortasha aýyr dep baǵalanǵan. Aldaǵy kúnderi ony aýrýhanadan shyǵarady dep josparlanyp otyr, – dep habarlady vedomstvo ókilderi.

Buǵan deıin kúdiktiniń týystary áleýmettik jelide er adamnyń ustalǵannan keıin soqqyǵa jyǵylǵany týraly málimdemeler jarııalaǵan bolatyn. Olar quqyq qorǵaý organdarynyń qyzmetkerlerin jaýapqa tartýdy talap etti. Alaıda bul málimdemeler ázirge resmı túrde rastalǵan joq.

Kazinform redaktsııasy kúdiktiniń týystarynyń málimdemesine qatysty túsinikteme alý úshin tórt kún buryn ShQO Polıtsııa departamentine resmı saýal joldaǵan. Biraq áli jaýap kelgen joq.

Eske salsaq, osyǵan deıin Óskemen qalasynda polıtsııa qyzmetkerin óltirip ketkeni habarlanǵan.