Óskemende polıtseıdi boqtaǵan áıel jazalandy

ÓSKEMEN. KAZINFORM – Óskemen qalasynda polıtsııa qyzmetkerin mas kúıde boqtap tasaǵan áıel 80 saǵattyq qoǵamdyq jumysqa tartyldy.

Qalalyq № 2 soty baspasóz qyzmetiniń málimetine súıensek, quqyq qorǵaý organy qyzmetkerin balaǵattaǵan áıelge qatysty qylmystyq is qaraldy.

— Osy jyldyń qyrkúıek aıynda polıtsııa kapıtany er adamǵa urlyq faktisiniń mán-jaıyn anyqtaý úshin polıtsııa bólimine barýdy usynǵan kezde onyń áıeli shý shyǵarǵan. Mas kúıdegi áıel tártip saqshysyn balaǵattaı jóneldi. Onyń kinási beınejazbamen, jábirlenýshiniń aıǵaqtarymen jáne tergeý hattamalarymen rastaldy, — delingen aqparatta.

Sot barysynda áıel adam óz kinásin moıyndap, bul isine ókinetindigin jetkizdi. Alaıda aıyptalýshynyń mas kúıde bolýy jazany aýyrlatatyn mán-jaı dep tanyldy.

Sot sheshimimen áıel 80 saǵattyq qoǵamdyq jumysqa tartyldy. Úkim áli zańdy kúshine engen joq.

Eske salsaq, ShQO-da alıment tólemegen adam alǵash ret túrmege qamaldy.