Óskemende polıtseı kóz jumǵan dámhanadaǵy kıkiljińde zardap shekken er adamnyń jaǵdaıy qalaı
ÓSKEMEN. KAZINFORM — Óskemen qalasynda polıtsııa qyzmetkeri kóz jumǵan dámhanadaǵy kıkiljińde zardap shekken er adam qazir aýrýhanada jatyr.
Eske salsaq, oqıǵa 4 qazanǵa qaraǵan túni qaladaǵy dámhanalardyń birinde bolǵan. Dámhanaǵa kelýshilerdiń biri ózin durys ustamaǵany úshin eskertý jasaǵan 40 jastaǵy jergilikti turǵynǵa dene jaraqatyn keltirgen.
Alǵan jaraqattarynyń saldarynan ol kóz jumdy. Kúdiktiniń áreketinen taǵy bir azamat zardap shekti. Keıin marqumnyń polıtsııa qyzmetkeri ekeni, biraq oqıǵa kezinde onyń qyzmette bolmaǵany anyqtaldy.
ShQO Densaýlyq saqtaý basqarmasy baspasóz qyzmetiniń málimetine súıensek, zardap shekken er adam qazirgi ýaqytta mamandandyrylǵan medıtsınalyq ortalyqta jatyr.
— Ol neırohırýrgııa bóliminde tıisti em qabyldap jatyr. Patsıenttiń jaǵdaıy ortasha aýyr dep baǵalandy. Jaqyn kúnderi ony aýrýhanadan shyǵarý josparlanǵan, — delingen aqparatta.
Eske salsaq, osyǵan deıin Tarazda er adamdy pyshaqtap óltirgen kúdikti ustalǵany habarlanǵan.
