Óskemende polıtseıler otyrǵan kólik jol apatyna sebepker boldy
ÓSKEMEN. QazAqparat - Óskemen qalasyndaǵy Bazovaıa kóshesinde adam ólimine ákep soqtyrǵan jol apaty boldy, dep habarlaıdy «QazAqparat» HAA polıtsııa departamentine silteme jasap.
Aldyn ala málimetter boıynsha,«Toyota Carina» kóliginiń júrgizýshisi ózge kólikten basyp ozbaq bolyp, jol qaýipsizdigine kóz jetkizbeı, qarsy bette kele jatqan «Lexus»-pen jáne ózimen bir jolaqta qozǵalǵan «Nissan»-men soqtyǵysqan.
Apat saldarynan úsh azamat - «Lexus» júrgizýshisi, sondaı-aq «Toyota» kóliginiń júrgizýshisi men jolaýshysy aýrýhanaǵa jetkizildi. «Toyota»-da bolǵan 38 jastaǵy jolaýshy (Óskemen polıtsııa basqarmasynyń qyzmetkeri) alǵan jaraqattarynan oqıǵa ornynda kóz jumdy.
«Jol apaty faktisimen QR QK 345-babynyń 3-bóligimen qarastyrylǵan quqyqbuzýshylyq belgileri boıynsha sotqa deıingi tergeý amaldary bastaldy. Qylmystyq is boıynsha barlyq tıisti tergeý amaldary júrgizilýde, saraptamalar taǵaıyndaldy», - dep naqtylady polıtsııadan.
Aıta keteıik, jol apaty kezinde «Toyota» kóliginde qalalyq polıtsııa basqarmasynyń úsh qyzmetkeri - kóliktiń ıesi jáne eki jolaýshy otyrǵany anyqtaldy. Olardyń barlyǵy qyzmetten tys ýaqytta bolǵan.
