Óskemende polıtseıler qarda jatqan jalańash er adamdy qutqardy
ÓSKEMEN. QazAqparat – Óskemende polıtseıler 35 gradýs aıazda jolda qar ústinde jatqan jalańash er adamdy taýyp alǵan. Tártip saqshylary ony úsik shalýdan qutqaryp qalǵan, dep habarlaıdy QazAqparat qalalyq Polıtsııa basqarmasyna silteme jasap.
Oqıǵa 21 qarashada bolǵan. Qalada synap baǵanasy mınýs 35 gradýs aıazdy kórsetti. Saǵat 05.30-da shamasynda «Qyran-74» patrýldik ekıpajy qaraýyldaý kezinde joldyń ortasynda jatqan jalańash adamdy taýyp alǵan. Er adam qar ústinde qımylsyz jatqan.
Er adamdy taýyp alǵan polıtseıler Qanat Asylǵazın men Damır Aýǵanbaev birden «102»-ge habarlap, jedel járdem shaqyrady. Qyzmetkerler qatty tońyp qalǵan er adamnyń boıyn jylytý úshin patrýldik mashınalaryna otyrǵyzyp, kómek kórsetedi, alaıda er adam barynsha qarsylyq kórsetip, ózin durys ustamaıdy. Qazirgi ýaqytta bolǵan jaǵdaıdyń sebepteri anyqtalyp jatyr.
Osylaısha «Qyran-74» ekıpaj qyzmetkerleri adam ómirin saqtap qaldy.
21-23 qarasha kúnderi «Qaýipsiz jol» jedel aldyn alý sharasy ótýde, osyǵan baılanysty túngi ýaqytta qala men onyń mańyndaǵy eldi mekenderde polıtsııa jasaqtarynyń jumysy kúsheıtildi.
