Óskemende polıtseıler balalarymen birge dalada qalǵan áıelge kómektesti
Qalalyq Polıtsııa basqarmasy baspasóz qyzmetiniń málimetine súıensek, qıyn jaǵdaıda qalǵan áıel kimnen kómek suraryn bilmeı Instagram jelisindegi oqyrmany kóp pablıkterdiń birine jazǵan. Belgili bolǵandaı, onyń kúıeýimen shańyraq kótergenine 8 jyldan asypty.
«Osy ýaqyt boıy jubaıym maǵan qysym kórsetip keldi. Únemi kemsitip, ózi aýyryp qalsa da, jumysynda qandaı da bir keleńsizdikter bolsa da meni kinálaıtyn. Ýaqyt óte kele barlyq qıyndyq meniń kesirimnen dep oıladym», - deıdi azamatsha.
Bastapqyda ul bosanýy, sońynan qyz balasyn dúnıege ákelýi kúıeýimen jáne onyń týystarymen qarym qatynasyn ózgertedi dep sengen. Alaıda er adamnyń atustary týǵanyna degen qýanyshy uzaqqa sozylmady.
«Jumystan jaı keletindi shyǵarǵan ol keıinnen múlde úıge qonbaı ketti. Al qyzym týǵannan keıin únemi urys-keris shyǵaryp, meni uryp-soǵyp, úıden qýatyn. Ol ishimdik ishe bastaǵan soń jaǵdaı múlde ýshyǵyp ketti. Osy joly taǵy da mas bolyp kelip, zattarymyzdy syrtqa laqtyryp, sýyq túskende balalarymmen birge úıden qýyp shyqty. Sol túni qurbymnyń úıinde qondym. Basqa sharam qalmaǵandyqtan áleýmettik jeli arqyly halyqtan kómek suradym», - dep jylady áıel.
Polıtseıler pablık ákimshiligimen habarlasyp, sol arqyly áıel adammen baılanysqa shyqqan. Polıtsııa basqarmasynyń áıelderdi zorlyq-zombylyqtan qorǵaý bóliminiń ınspektory Alına Mokına atalǵan fakti boıynsha is qozǵady.
«Ómirde qıyn jaǵdaıǵa tap bolǵan áıelge kómekteskimiz keldi. Onymen birge balalary da sergeldeńge túsken. Qazirgi ýaqytta olardyń jaǵdaılary jaqsy. Inspektorlar áıel adam men 2 búldirshindi qabyldaý ortalyǵyna ornalastyryp, jan-jaqty kómek kórsetýde», - dedi basqarma bastyǵynyń baspasóz hatshysy Altynaı Komchýbaeva.