Óskemende polıtseıler aýyr haldegi júkti áıeldi aýrýhanaǵa jetkizdi
ÓSKEMEN. QazAqparat – Óskemen qalasynda polıtsııa qyzmetkerleri aýyr haldegi júkti áıelge aýrýhanaǵa jetýge kómektesti, dep habarlaıdy QazAqparat tilshisi.
Qalalyq polıtsııa basqarmasy baspasóz qyzmetiniń málimetine súıensek, patrýldik polıtsııa batalonynyń ınspektorlary Qaırat Elýbaev pen Aıdyn Orynǵazy qyzmet babymen júrgende olardyń janyna toqtaǵan kólik júrgizýshisi kómek suraǵan.
«Er adam júkti áıelinen qan ketip jatqanyn, ony aýrýhanaǵa jyldam jetkize almaı qalam ba dep qorqatynyn aıtty. Esh oılanbastan biz arnaıy jaryq shamdaryn jaǵyp, jyldamdyqty arttyryp, aýrýhanaǵa baǵyt aldyq. Azamat áıelimen birge sońymyzdan ilesip júrdi», - deıdi Aıdyn Orynǵazy.
Sońynan belgili bolǵandaı, júktiliktiń altynshy aıynda bolǵan áıel egiz sábılerdi kútip júrgen.
Sondyqtan onyń jaǵdaıy óte qaýipti boldy.
Degenmen polıtseılerdiń jedeldigi men dárigerlerdiń kásibıliginiń arqasynda bolashaq anany ǵana emes, onyń eki balasyn da qutqarýǵa múmkindik týdy.
Óz kezeginde erli-zaıyptylar polıtseılerge shynaıy rızashylyǵyn bildirdi.
