Óskemende polıtseıler ardagerdiń urlanǵan ordenin qaıtardy
ÓSKEMEN. QazAqparat - Óskemende polıtseıler ardagerdiń urlanǵan memlekettik ordenin ózine qaıtardy, dep habarlaıdy QazAqparat tilshisi ShQO Іshki ister departamentine silteme jasap.
«17:00 shamasynda «102» nómirine Óskemenniń 52 jastaǵy turǵyny habarlasyp, páterinde urlyq bolǵanyn aıtty. Onyń sózine qaraǵanda, 15:45-16:30 aralyǵynda belgisiz bireýler ákesiniń jeke úıine terezeden kirgen. Ekinshi qabatqa kóterilip, jatyn bólmeden «Qurmet» ordenin qoldy etken», - deıdi ІІD ókilderi.
Polıtsııa bir saǵattyń ishinde quqyqbuzýshynyń tulǵasyn anyqtady. Buryn osy taqylettes qylmystyq áreketteri úshin sottalǵan 32 jastaǵy Óskemen turǵyny ustaldy. Ol óz aıybyn moıyndaǵan.
Óskemenniń 76 jastaǵy turǵynyna tıesili «Qurmet» ordeni ıesine qaıtaryldy.
Qazir osy derek boıynsha QR Qylmystyq kodeksiniń 188-babynyń 2-bóligine sáıkes sotqa deıingi tergep-tekserý júrip jatyr.
