Óskemende polıtseıdi kólikpen qaǵyp óltirgen áıel bostandyqqa shyǵýy múmkin
ASTANA. QazAqparat -ShQO ákimshilik polıtsııasynyń eks-basshysynyń 26 jastaǵy áıeli Botagóz Baqytjanova mas kúıinde krımınaldyq polıtsııa qyzmetkerin kólikpen qaǵyp óltirip, oqıǵa ornynan boı tasalaǵan bolatyn.
Eki jylǵa sottalǵan ol, endigide jazasynyń qalǵan merzimin aıyppulǵa aýystyrýdy surap otyr. Sot aıypkerdiń ótinimin qanaǵattandyrdy jáne jaqyn arada áıel kolonııadan shyǵýy múmkin, dep habarlady QazAqparat YK-news.kz saıtyna silteme jasap.
Esterińizde bolsa, jol-kólik apaty jeltoqsannyń 26-nan 27-ine qaraǵan túni Kúlenov aýylynda bolǵan edi. Tergeýdiń anyqtaýynsha, «KShT» meıramhanasyndaǵy korporatıvti keshten shyqqan B.Baqytjanova mas kúıinde «Nıssan Mýrano» kóligine otyryp, óziniń tanysy Mırhat Otchegarovty qaǵyp ketti. Avtoledı oqıǵa ornynan boı tasalady, al zardap shegýshi alǵan jaraqattan kóz jumdy.
15 sáýirde №2 Óskemen soty Botagóz Baqytjanovany qonystaný kolonııasyna eki jylǵa bas bostandyǵynan aıyrý jazasyna kesti jáne zardap shegýshi taraptyń moraldyq shyǵyn retinde 3 mıllıon teńge óndirip alý týraly azamattyq talabyn qanaǵattandyrdy. Qaza tapqan polıtseıdiń týystary shyǵarylǵan sheshimmen kelispeı, ShQO oblystyq sotyna apellıatsııalyq shaǵym túsirdi.
Jarty jyl ótpeı jatyp, 23 qyrkúıek kúni Baqytjanova qonystaný kolonııasynda ótep jatqan merzimin jeńilirek jazaǵa aýystyrý týraly ótinim jazdy.
Sottalýshynyń jaǵymdy minezdemesin negizge ala otyryp, sot ol jazany tolyq kólemde óteýdi qajet etpeıdi degen uıǵarym shyǵardy.
«Sottalýshynyń ótinishhaty qanaǵattandyrylsyn, jazanyń ótelmegen bóligi 271 488 teńge kólemindegi aıyppulǵa (Ótelmegen jazanyń ár 4 kúnine 1 AEK - red.) aýystyrylsyn», - degen sheshim shyǵardy.
