Óskemende podezde myltyqpen oq atyp kórshilerin shoshytqan er adam 3 jylǵa sottaldy

Óskemen qalasynda er adam kópqabatty úıdegi páterinde jáne podezde myltyqpen oq atyp jurttyń úreıin qashyrǵany úshin túrmege qamaldy, dep habarlaıdy Kazinform.

Jibek matalar kombınaty yqsham aýdanyndaǵy kóshelerdiń birinde ornalasqan kópqabatty turǵyn úıde polıtsııaǵa habarlasqan azamattardyń biri podezde myltyq ustaǵan adam júrgenin jáne oq atylǵan dybystardy estigenin jetkizgen.

Birden oqıǵa ornyna tártip saqshylary kelip jetti. Belgili bolǵandaı, er adam alkogoldi ishimdikke masaıyp, qolyna myltyq alǵan.

«Sottalýshy óz páterinde jáne podezde birneshe ret oq atty. Oǵan qatysty QR Qylmystyq Kodeksiniń 293-baby 3-bóligi (Buzaqylyq) boıynsha qylmystyq is qozǵalǵan. Aıyptalýshynyń kinásin kórshileri, kýágerler jáne ballıstıkalyq saraptama rastady. Er adam da óz kinásin moıyndaǵan. Sot onyń qoǵamǵa qaýiptiligin eskerip, 3 jyl merzimge bas bostandyǵynan aıyrý jazasyn taǵaıyndaý qajet degen qorytyndyǵa keldi», - dep habarlady Óskemen qalalyq sotynyń baspasóz qyzmeti.

Úkim áli zańdy kúshine engen joq.