Óskemende pnevmonııa kúdigimen kún saıyn aýrýhanaǵa 20-ǵa jýyq adam júginedi

ÓSKEMEN. KAZINFORM –  Óskemen qalasynda aýrýhanalarǵa pnevmonııa kúdigimen kún saıyn 15-20 adam júginedi.

Óńir boıynsha osy jyldyń toǵyz aıynda JRVI juqtyrǵandar sany 200 863 adam bolǵan. Bul kórsetkish ótken jyldyń sáıkes kezeńimen salystyrǵanda 1,74 ese artyp otyr. Sondaı-aq Óskemende pnevmonııaǵa shaldyqqandar sany da artyp keledi.

Aýrýhanaǵa kún saıyn 15-20 adam pnevmonııaǵa kúdikpen júginedi. Epıdemııalyq maýsymda ólim-jitim tirkelgen joq.

«Vırýstyq jáne kovıdtik pnevmonııa tirkelip jatyr. Pýlmonologııa bóliminde 50 tósek-oryn bar. Naýqastarǵa oryn men qajetti dári-dármek qory jetkilikti. Qazir jansaqtaý bóliminde eki naýqas jatyr, bireýi jasandy tynys alý apparatyna qosylǵan», - dedi Óskemendegi №4 qalalyq aýrýhananyń bas dárigeri Sergeı Popov.

Eske salsaq, osyǵan deıin óskemendikterdiń №1 emhananyń jaǵdaıyna shaǵymdanǵanyn habarlaǵan edik.