Óskemende plastıkti qaıta óńdeıtin mobıldi stantsııa iske qosylady
ÓSKEMEN. KAZINFORM – Shyǵys Qazaqstan oblysynda 2029 jylǵa deıingi «Taza Qazaqstan» tujyrymdamasyn iske asyrýdyń óńirlik jospary jańartyldy. Qujattaǵy negizgi jobalardyń biri – Óskemen qalasynda plastık qaldyqtaryn qaıta óńdeýge arnalǵan ekologııalyq eko-trakty iske qosý.
Jyljymaly keshen shreder, ekstrýder jáne plastık qaldyqtaryn sol jerde-aq qaıta óńdeýge múmkindik beretin ózge de zamanaýı jabdyqtarmen qamtylady.
– Eko-trak qaldyqtardy qaıta óńdeý júıesin damytýǵa jáne halyqtyń ekologııalyq mádenıetin qalyptastyrýǵa baǵyttalǵan naqty jobalardyń biri bolady, – delingen óńirlik josparda.
Budan bólek, oblysta qaldyqtardy basqarý ınfraqurylymyn keńeıtý kózdelgen. Altaı jáne Shemonaıha aýdandarynda qatty turmystyq qaldyqtardy suryptaý jáne qaıta óńdeý boıynsha eki joba júzege asyrylmaq.
Qujatqa sáıkes, 2029 jylǵa qaraı Shyǵys Qazaqstan oblysynda kommýnaldyq qaldyqtardy qaıta óńdeý úlesin 28 paıyzdan 33 paıyzǵa deıin arttyrý josparlanǵan. Sonymen qatar turǵyndardyń ekologııalyq ómir sapasyna qanaǵattaný deńgeıin 49 paıyzdan 55,2 paıyzǵa deıin jetkizý kózdelip otyr.
Aımaqta ekologııalyq baqylaýdy kúsheıtý sharalary da qarastyrylǵan. 2027 jyldyń sońyna deıin oblys aýmaǵynda ekologııalyq zańbuzýshylyqtardy tirkeıtin 500 beınekamera ornatý josparlansa, Óskemende atmosferalyq aýanyń sapasyn baqylaıtyn qosymsha avtomattandyrylǵan monıtorıng beketi iske qosylady.
Eske salsaq, osyǵan deıin Almatyda 1200-den asa plastık qaqpaq qaıta óńdeýge tapsyrylǵany habarlanǵan.
