Óskemende pyshaqpen qarýlanǵan ústi-basy qan-josa er adam ustaldy

ÓSKEMEN. KAZINFORM — Óskemen qalasynda kóshede qolyna pyshaq alyp, ústi-basy qan-josa bolyp júrgen er adam eldi shoshytty.

Oqıǵa búgin kúndiz Protozanov kóshesi boıyndaǵy jaǵalaýda bolǵan. Qolynda pyshaǵy bar, jalańash keýdesi qan-josa er adam jurttyń kózine birden tústi.

Bul týraly vıdeo áleýmettik jelide tarap ketti.

Kýágerler onyń denesinde jaraqattar baryn baıqaǵan. Oqıǵa ornyna jedel túrde polıtsııa qyzmetkerleri kelip jetti. 

— Tártip saqshylary 25 jastaǵy qala turǵynyn ustady. Mas kúıdegi azamattyń denesinde kesilgen jaraqattar bar. Aldyn ala málimet boıynsha ol óz-ózine jaraqat salǵan. Pyshaq tárkilenip, er adam jedel járdem brıgadasyna tapsyryldy, — dep habarlady ShQO Polıtsııa departamentiniń baspasóz qyzmetinen.

Qazirgi ýaqytta oqıǵanyń barlyq mán-jaıy anyqtalyp jatyr.

Eske salsaq, osyǵan deıin Almatyda er adam temirjol stantsııasy mańynda ózine qol salmaq bolǵany habarlanǵan.