Óskemende páterden órt shyǵyp, eki bala zardap shekti
ÓSKEMEN. QazAqparat – Óskemen qalasynda páterde rozetkadan órt shyǵyp, zeınetker men eki bala zardap shekti, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 13 maýsymda Promyshlennaıa kóshesindegi kópqabatty úıdiń birinshi qabatyndaǵy páterden órt shyqty. Qyzyl jalyn jıhazdy, turmystyq tehnıka men jeke zattardy sharpyǵan.
«Apattar medıtsınasy ortalyǵynyń qyzmetkerleri 2014 jáne 2011 jylǵy eki bala men olardyń 1959 jylǵy ájesine alǵashqy kómek kórsetip, ýlaný belgilerimen aýrýhanaǵa jetkizdi. Órt sóndirýshiler jalpy aýdany 20 sharshy metr aýmaqty jandyrǵan tilsiz jaýdy tolyqtaı aýyzdyqtady», - delingen aqparatta.
Belgili bolǵandaı, órt rozetkadan shyqqan. Buǵan elektr jabdyqtaryn montajdaý jáne paıdalaný kezinde qaýipsizdik talaptaryn saqtamaý sebep bolyp otyr.
