Óskemende páterdegi gaz qoparylysynan bir adam zardap shekti
ÓSKEMEN. QazAqparat – Óskemendegi páterdiń birinde gaz-aýa qospasy qoparylyp, bir adam zardap shekti, dep habarlaıdy QazAqparat tilshisi ShQO Tótenshe jaǵdaı departamentiniń baspasóz qyzmetine silteme jasap.
Mekemedegilerdiń aıtýynsha, Á.Qashaýbaev kóshesindegi bes qabatty, kóppáterli turǵyn úıdiń úshinshi qabatyndaǵy páterde gaz-aýa qospasy jarylyp, keıin jeke zattar da órtengen. Qoparylys kóshege estilip, kýágerler órt sóndirý qyzmetin shaqyrǵan.
«Úsh mınýttan keıin oqıǵa ornyna jetken órt sóndirýshiler 1949 jyly týǵan páter ıesin tapty. Onyń denesin kúıik shalǵan. Er adamdy apattar medıtsına ortalyǵy qyzmetkerleri birinshi qalalyq aýrýhanaǵa jetkizdi», - dep túsindirdi oblystyq TJD ókili.
0,5 sharshy metr aýmaqtaǵy órt aýyzdyqtaldy. Gaz-aýa qospasynyń jarylýynan kórshi páter de zardap shekken. Ol páterdiń qabyrǵa sylaqtary opyrylyp túsken.
Boljam boıynsha, órtke turmystyq gaz qurylǵysyn paıdalaný kezinde saqtyq sharasyn eskermeý sebep bolǵan.
