Óskemende páterde toqqa qosylǵan smartfonnan órt shyǵyp, turǵyndar evakýatsııalandy

ÓSKEMEN. QazAqparat – Óskemen qalasynda páterde toqqa qosylǵan telefonnan órt shyqty, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 18 sáýirde saǵat 23.30 shamasynda Chernova kóshesinde órt bolǵan.

«Kópqabatty úıdiń ekinshi qabatyndaǵy páterde jıhaz, tereze jáne esik bloktary, jeke zattar janyp ketti. Qaýipsizdik maqsatynda №7 órt sóndirý bóliminiń qyzmetkerleri 6 turǵyndy evakýatsııalady. Zardap shekken eshkim joq», - delingen aqparatta.

Tilsiz jaýdyń jalpy aýdany 45 sharshy metrdi quraǵan. Páter ıesiniń aıtýynsha, ol úıden ketip bara jatyp uıaly telefondy toqqa qosyp ketti. Qaıtyp oralǵanda páter ishi otqa oranǵan.

Osy rette, qutqarýshylar óńir jurtshylyǵyna órt qaýipsizdigi erejelerin qatań saqtaý qajettigin eskertti.

Esterińizge sala ketsek, osyǵan deıin ShQO-da dala órtiniń aldyn alý úshin 44 mobıldi top qurylǵandyǵyn habarlaǵan edik.