Óskemende páterde órt shyǵyp, eki bala zardap shekti
ShQO tótenshe jaǵdaılar departamenti baspasóz qyzmetiniń málimetine súıensek, órt 18 mamyr kúni tańerteń Slavskıı atyndaǵy jaǵalaý kóshesinde ornalasqan kópqabatty úıdiń 12-qabatyndaǵy páterde shyqqan.
«Habar túse salysymen órt sóndirýshiler sol jerge shuǵyl kelip jetti. Olar páter terezesinen qalyń qoıý tútin men ashyq jalynnyń shyǵyp jatqanyn kórgen. Birinshi kezekte páterlerdi barlaýǵa jáne zardap shekkenderdiń bar-joǵyn tekserýge kiristi. Nátıjesinde, syrtqa shyǵa almaı turǵan 9 turǵyn, onyń ishinde 4 bala qutqaryldy», - delingen aqparatta.
Tilsiz jaýdy aýyzdyqtaýǵa jeke quramnan 35 adam men 10 tehnıka jumyldyryldy. Órttiń jalpy aýdany – 50 sharshy metrdi qurady.
«Belgili bolǵandaı, páter ıesi jalyndy baıqap kalyp, óz betimen syrtqa shyǵyp úlgergen. Aldyn ala boljam boıynsha órt shyǵýynyń sebebi - elektr jabdyqtaryn montajdaý jáne paıdalaný kezinde qaýipsizdik talaptaryn saqtamaýdan nemese otpen abaısyzda jumys isteýden bolýy múmkin. Apattar medıtsınasy ortalyǵy men jedel járdem dárigerleri kórshi páterde tútinnen ýlanyp qalǵan 2009 jáne 2014 jylǵy 2 qyz balaǵa alǵashqy kómek kórsetti. Qazir olar aýrýhanaǵa jatqyzylǵan», - delingen aqparatta.