Óskemende páter tonaýmen aınalysyp kelgen top ustaldy
ÓSKEMEN. QazAqparat - Qylmystyq toptyń alǵashqy qylmysy 2016 jyldyń qyrkúıeginde tirkelipti. 28 jastaǵy azamatshanyń aıtýynsha onyń páterinen 2,6 mln teńgeniń baǵaly zattary joǵalǵan.
Olar nysanaǵa alǵan úıge kiltin dáldep jasaý arqyly enip, materıaldyq quny bar zattyń barlyǵyn jymqyryp otyrǵan. Ásirese altyn buıymdar men turmystyq tehnıkaǵa, tondar men baǵaly áshekeılerge basa nazar bólgen. Tonaýǵa az túsken úılerdiń ózinen kem degende 300 myń teńgeniń zaty joǵalypty. Uıymdasqan top bir úıden 5 mln teńgeniń zatyn urlaǵan kezi de bolypty.
Oblystyq ІІD baspasóz qyzmetiniń habarlaýynsha, bes adamdyq top bir jarym jyldyń ishinde 15 páterdi úptegeni anyqtalyp otyr. Olardyń áreketinen úı ıeleri 17 mln teńgege shyǵynyn shekken.
Urylardyń izine túsýge qurbandaryn ańdý kezindegi áreketteri sebepker bolsa kerek.
«Páterge túspes buryn urylar úı ıesin syrtynan 1-2 kún ańdıtyn bolǵan. Qyraǵy kórshiler olardyń kúdikti áreketterinen sekem alyp, saqshylarǵa aqparat bergen», delingen baspasóz qyzmetiniń aqparatynda.
Kúdikti beseý 21-46 jas aralyǵyndaǵy azamattar. Olarǵa qatysty Qylmystyq kodekstiń 188-baby boıynsha is qozǵaldy.
