Óskemende para bergen máslıhat depýtatyna 100 mln teńge aıyppul salyndy
ÓSKEMEN. KAZINFORM — Óskemen qalasynda kásipker ári oblystyq máslıhat depýtaty Dmıtrıı Somovqa qatysty sot úkimi shyqty.
Sot 100 mıllıon teńge kóleminde aıyppul saldy. Úkim jarııalanǵannan keıin ol sot zalynan bosatyldy.
Sot Óskemen qalasynyń qylmystyq ister jónindegi mamandandyrylǵan aýdanaralyq sotynda qaraldy. Aıyptalýshyǵa laýazymdy tulǵaǵa para berdi degen aıyp taǵylǵan.
Tergeý málimetinshe, «Vostokvzryvprom» JShS-niń basshysy qalalyq qurylys bóliminiń basshysyna ózine qarasty kompanııalardyń qurylys nysandary boıynsha oryndalǵan jumys aktilerine jedel qol qoıyp, tólem júrgizý úshin 5 mln teńge para bergen.
— Qylmystyq is sotqa kináni moıyndaý týraly protsestik kelisimmen túsken. Sot aıyptalýshyny QR Qylmystyq Kodeksiniń 367-baby (para berý) boıynsha kináli dep tanyp, oǵan para somasynyń jıyrma eselengen mólsherinde, ıaǵnı 100 000 000 teńge aıyppul saldy. Sondaı-aq oǵan ómir boıyna memlekettik qyzmette, sýdıa laýazymynda, jergilikti ózin-ózi basqarý organdarynda, Ulttyq bank pen onyń vedomstvolarynda, qarjy naryǵy men qarjy uıymdaryn retteý, baqylaý jáne qadaǵalaý jónindegi ýákiletti organda, memlekettik uıymdar men kvazımemlekettik sektor sýbektilerinde qyzmet atqarýǵa tyıym salyndy, — dep habarlady ShQO sotynyń baspasóz qyzmetinen.
Sonymen qatar sottalǵan azamatty III dárejeli «Eńbek Dańqy» ordeninen aıyrý týraly QR Prezıdentiniń atyna usynys engizilgen. Úkim áli zańdy kúshine engen joq.
Eske salsaq, osyǵan deıin Óskemenniń eks-ákiminiń apellıatsııalyq soty ótetin kún belgili bolǵany habarlanǵan.
