Óskemende ózine qol salmaq bolǵan boıjetken qutqaryldy
ÓSKEMEN. QazAqparat – Ulttyq ulan sarbazdary boıjetkendi qansyrap jatqan jerinde taýyp alyp, alǵashqy medıtsınalyq kómek kórsetken, dep habarlaıdy QazAqparat QR Ulttyq ulannyń baspasóz qyzmetine silteme jasap.
«Quqyqtyq tártip» jedel aldyn alý sharalary kezinde Ulttyq ulannyń 5518 áskerı bóliminiń áskerı narıady balalar alańynda qansyrap jatqan boıjetkendi taýyp alǵan. Qatardaǵy jaýynger Tabys Qaırat radıostantsııa arqyly patrýldik toptyń bastyǵy – leıtenant Ermek Ýálıevti shaqyrady. Ulttyq ulan sarbazdary osylaısha boıjetkenge alǵashqy medıtsınalyq kómek kórsetip, qolyn dákemen orap, qaýiptiń aldyn alǵan.
Boıjetkenniń qolyn lezvıemen tilgilep, óz-ózine qol salmaq bolǵany anyqtalyp otyr. Ol bul qadamǵa súıiktisimen kelispeı qalýy sebebinen barýy múmkin.
Osydan keıin ony jedel járdem brıgadasy alyp ketti. Boıjetken oblys ortalyǵyndaǵy birinshi qalalyq aýrýhanaǵa jetkizildi.
