Óskemende ózendegi sý deńgeıiniń kóterilýine baılanysty kópir astyndaǵy jol jabyldy
ÓSKEMEN.KAZINFORM — Óskemen qalasyndaǵy Úlbi ózeninde sý deńgeıi kóterildi.
Sonyń saldarynan Úlbi kópiriniń astyndaǵy keıbir ýchaskelerdi sý basqan. Osyǵan baılanysty bul aýmaqta kólik qozǵalysy ýaqytsha toqtatyldy. Mamandardyń aıtýynsha, mundaı jaǵdaı kóktem mezgilinde qar erip, sý deńgeıi kóterilgen kezde jıi qaıtalanady.
— Úlbi ózenindegi sý deńgeıiniń kóterilýine baılanysty kópir astyndaǵy joldardy ishinara sý basty. Qolaısyzdyqtyń aldyn alý maqsatynda qozǵalys erterek jabylady. Bul jyl saıyn qaıtalanatyn tájirıbe. Sý deńgeıi turaqtalǵan boıda joldar qaıta ashylady, — dedi «Taza Óskemen» kommýnaldyq kásipornynyń basshysy Marat Jarketkenev.
Qaýipsizdik maqsatynda kommýnaldyq qyzmetter qozǵalysty aldyn ala shektep otyr. Shekteý gıdrologııalyq jaǵdaı tolyq turaqtalǵanǵa deıin saqtalady. Sý deńgeıi tómendegen soń jol qaıta ashylady.
Qala turǵyndaryna baǵyttaryn aldyn ala josparlap, basqa joldarmen júrýge keńes berildi.
Eske salsaq, osyǵan deıin Qazaqstanda sý tasqynynyń kelesi kezeńi mamyr aıynyń ortasy men sońyna qaraı boljanyp otyrǵany habarlanǵan.
