Óskemende órtengen úıden er adamnyń máıiti tabyldy
ÓSKEMEN. KAZINFORM – Óskemen qalasynda otqa oranǵan jer úıden er adamnyń máıiti tabyldy.
ShQO Tótenshe jaǵdaılar departamenti baspasóz qyzmetiniń málimetine súıensek, órt Shmelev log shaǵyn aýdanyndaǵy Ryleev kóshesinde ornalasqan jer úıde shyqqan.
— Oqıǵa ornyna órt sóndirý bólimshesiniń qyzmetkerleri shuǵyl kelip jetti. Sol kezde úı ishin ashyq jalyn sharpyp jatqan. Kóp uzamaı tilsiz jaý tolyqtaı aýyzdyqtaldy. Úı ishinen 30 jastaǵy er adamnyń máıiti tabyldy, — dep habarlady vedomstvo ókilderi.
Órttiń jalpy aýmaǵy 70 sharshy metrdi quraǵan. Ottyń naqty neden shyqqany ázirge belgisiz. Qazirgi ýaqytta oqıǵanyń mán-jaıy anyqtalyp jatyr.
Eske salsaq, osyǵan deıin Astananyń Saraıshyq aýdanynda turǵyn úı kesheniniń janyndaǵy avtoturaqta bes jeńil avtokólik órtengeni habarlanǵan.
