Óskemende órtengen úıden 13 adam qutqaryldy
ÓSKEMEN. QazAqparat -Óskemende besqabatty úıden órt shyǵyp, eki áıel aýrýhanǵa tústi, dep habarlaıdy QaAqparat tilshisi.
Tańǵy saǵat 6,30-da Óskemen qalasynyń Maıakovskıı kóshesinde ornalasqan bes qabatty úıdiń úshinshi qabatyndaǵy páterden órt shyqany týraly dabyl túsken. Qalalyq tótenshe jaǵdaılar basqarmasynyń málimeti boıynsha, qyzyl jalynnan eki áıel zardap shegipti.
«1959 jylǵy áıeldiń eki aıaǵyn da kúıik shalǵan. Al páter ıesiniń 1935 jylǵy anasy tútinge ýlanǵan. Ekeýi de №1 qalalyq aýrýhanaǵa jetkizildi» - delingen basqarmanyń baspasóz qyzmeti taratqan aqparatta.
Órtti aýyzdyqtaýǵa qatysqan 18 qyzmetker atalmysh úıden 12 eresek adam men 1 balany qaýipsiz jerge shyǵardy. Qyzyl jalynnyń sharpýy qatty bolǵany sonshalyq, ústińgi qabattaǵy úılerdiń bárin ys basqan. Páterdiń 18 sharshy metr bóligi kúlge aınalǵan. Úı jıhazdarymen birge turmystyq tehnıkalar da otqa oranypty. Órttiń shyǵýyna elektr qurylǵysyn durys paıdalanbaý sebep boldy degen boljam bar.
