Óskemende órtengen úıde qalyp qoıǵan múgedek adamdy kórshileri qutqardy
ÓSKEMEN. QazAqparat – Óskemen qalasynda órtengen úıde qalyp qoıǵan múmkindigi shekteýli er adamdy kórshileri syrtqa alyp shyqty, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, búgin tús kezinde Nazarbaev dańǵylynda ornalasqan kópqabatty turǵyn úıdegi páterlerdiń birinen órt shyqqan. Oqıǵa ornyna qutqarýshylar shuǵyl kelip jetti.
«Órt sóndirýshiler kelgenge deıin 1971 jylǵy múgedek er adamdy kórshileri Roman Tomılov pen Artýr Zýbko qutqarǵan. Olar esikti buraýyshpen ashyp kirip, úı ıesin syrtqa alyp shyqty. Apattar medıtsınasy ortalyǵynyń dárigerleri ýlaný belgileri bar múmkindigi shekteýli azamatty aýrýhanaǵa jetkizdi», - delingen aqparatta.
Kóp uzamaı qutqarýshylar 2 sharshy metr aımaqty sharpyǵan qyzyl jalyndy aýyzdyqtady. Aldyn ala málimet boıynsha órt – ot jaǵý kezindegi salaqtyqtan paıda bolýy múmkin.
