Óskemende Ortalyq Azııadaǵy alǵashqy avtokólik sertıfıkattaý ortalyǵy ashylady
ASTANA. KAZINFORM — Tamyz aıynda Shyǵys Qazaqstan tehnıkalyq ýnıversıtetinde Ortalyq Azııadaǵy alǵashqy halyqaralyq avtokólik sertıfıkattaý ortalyǵy iske qosylady. Endi Qazaqstan men óńirdegi qytaılyq avtokólik dılerlik ortalyqtarynyń mamandary Óskemende halyqaralyq biliktilik sertıfıkatyn ala alady.
Ǵylym jáne joǵary bilim mınıstri Saıasat Nurbektiń aıtýynsha, 2023 jyly Shyǵys Qazaqstan tehnıkalyq ýnıversıtetinde Qytaıdyń ınjenerlik bilim berý jobasy aıasynda Lý Ban sheberhanasy ashylǵan. Qazir onda 500-den astam stýdent avtonomdy basqarý, jasandy ıntellekt, tsıfrlyq egizder jáne ıntellektýaldy kólik júıeleri baǵytynda bilim alyp jatyr.
2025 jyly ýnıversıtette halyqaralyq seriktestermen birlesip SMART Driving Technology ınjenerlik ortalyǵy quryldy. Ortalyqta bilim berýmen qatar qoldanbaly ǵylymı zertteýler de júrgiziledi.
Atap aıtqanda, Allur kompanııasymen birge elektromobılderge arnalǵan aıazǵa tózimdi jańa býyn akkýmýlıatorlary jáne avtokólik pen taý-ken tehnıkasyna arnalǵan JI júıeleri ázirlenip jatyr. Al KazTechna kompanııasymen elektroavtobýstardyń tıimdiligin arttyrýǵa baǵyttalǵan ǵylymı jobalar qolǵa alynǵan.
— Bul joba búginde halyqaralyq deńgeıge kóterilip otyr. Tamyz aıynda Lý Ban sheberhanasy bazasynda Great Wall Motor, Tıantszın kásiptik ınstıtýty jáne «Astana Motors» kompanııalarynyń qatysýymen halyqaralyq sertıfıkattaý ortalyǵy jumysyn bastaıdy, — dedi Saıasat Nurbek.
Atalǵan ortalyq avtokólikterdi dıagnostıkalaý, olardyń ıntellektýaldy júıeleri boıynsha mamandardy daıyndap, biliktilik sertıfıkatyn beredi. Mundaı qujat Qytaı avtokólikteriniń resmı dılerlik ortalyqtarynda jumys isteý úshin mindetti sanalady.
— Bul — Ortalyq Azııadaǵy alǵashqy sertıfıkattalǵan ortalyq. Qazir óńirde Qytaı avtokólikterine qyzmet kórsetetin 100-den astam dılerlik kompanııa jumys isteıdi. Onyń ishinde 34 dılerlik ortalyq Qazaqstanda ornalasqan. Bolashaqta olardyń mamandary Óskemende biliktiligin rastap, halyqaralyq sertıfıkattan óte alady. Al Serikbaev ýnıversıtetiniń túlekterin biliktilik sertıfıkatyn avtomatty túrde alady, — dedi Saıasat Nurbek.
Aıta keteıik, Úkimet otyrysynda mashına jasaý salasyn damytý máselesi qaralyp jatyr.
Qazaqstannyń 19 oqý ornynda avtoónerkásip mamandary daıarlanyp jatyr.
