Óskemende órt sóndirýshi tilsiz jaýmen kúreste aıaǵyn syndyryp aldy

ÓSKEMEN. KAZINFORM — Óskemen qalasynda jaraqat alǵan órt sóndirýshi oń aıaǵynyń jabyq synýy dıagnozymen travmatologııalyq bólimshege jatqyzyldy.

Oqıǵa 5 mamyrda Krasın kóshesinde bolǵan. Turǵyn úıdiń tórtinshi qabatynda órt shyqqan. Avarııalyq-qutqarý jumystaryn júrgizý barysynda № 7 órt sóndirý bóliminiń qyzmetkeri zardap shekti.

— Órtti sóndirý maqsatynda ol úshinshi qabatta ornalasqan páterdiń balkonyna avtosatysyz kóterildi. Oqıǵa bolǵan kezde ishte turǵyndar bolǵan joq. Qutqarýshylardyń jedel áreketteriniń arqasynda jalynnyń kórshi páterler men joǵarǵy qabattardaǵy balkondarǵa taralýyna jol berilmedi, — dep habarlady ShQO TJD baspasóz qyzmetinen.

Órttiń alǵashqy mınýttarynan bastap avtosaty oqıǵa ornynda boldy. Biraq tyǵyz ósken aǵashtardan ony ornatý múmkin bolmady.

— Zardap shekken qyzmetkerge QR TJM Apattar medıtsınasy ortalyǵynyń mamandary alǵashqy medıtsınalyq kómekti ýaqtyly kórsetti. Sodan keıin ony oń aıaǵynyń jabyq synýy dıagnozymen travmatologııalyq bólimshege jatqyzdy. Qazirgi ýaqytta órt sóndirýshiniń jaǵdaıy qanaǵattanarlyq dep baǵalandy. Qyzmettik tergeý júrgizilip jatyr, — delingen aqparatta.

Eske salsaq, buǵan deıin ShQO-da 100 mlrd teńgeniń órt sóndirý tehnıkasy alynatyny habarlanǵan.