Óskemende órt sóndirýshiler otqa oranǵan úıden 2 adamdy aman alyp shyqty
ShQO Tótenshe jaǵdaılar departamenti baspasóz qyzmetiniń málimetine súıensek, búgin qala kósheleriniń birindegi toǵyzqabatty úıden órt shyqqan.
«Altynshy qabatta ornalasqan páter otqa orandy. Oqıǵa ornyna órt sóndirýshiler shuǵyl kelip jetti. Olar tútin tumshalaǵan podezden 25 adamdy, onyń ishinde 8 balany evakýatsııalady. Sodan soń páter ishindegi jalyndy aýyzdyqtaýǵa kiristi. Sol kezde ishte 2 adam bolǵan. Jyldam áreket etken TJD qyzmetkerleri áıel men er adamdy qutqaryp qaldy», - delingen aqparatta.
Denesin kúıik shalǵan er adam aýrýhanaǵa jatqyzyldy. Al áıeldi jedel járdem dárigerleri tekserip, densaýlyǵyna eshqandaı zalal kelmegenine kóz jetkizdi.
Qutqarýshylardyń úılesimdi is-qımyldarynyń arqasynda órt kórshi páterlerge taralǵan joq. Belgili bolǵandaı, tilsiz jaýdyń shyǵý sebebi – temeki shegý kezindegi abaısyzdyq.
Aıta keteıik, órtti sóndirýge jeke quramnan barlyǵy 13 adam men 4 tehnıka jumyldyrylǵan.