Óskemende órt sóndirý kóligi men tramvaı soqtyǵysty
ÓSKEMEN. QazAqparat – Óskemen qalasynda órt sóndirý kóligi men tramvaı soqtyǵysqan, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetinshe, jol-kólik oqıǵasy 21 qyrkúıek kúni saǵat 8.30-da Úlbi ózenindegi kópirde boldy. Kópirden Nurmaǵambetov kóshesine qaraı shyǵaberiste órt sóndirý kóligi men tramvaı soqtyǵysqan.
«Tramvaı kópirden ótip kele jatty, al órt sóndirý kóligi Protozanov kóshesimen júrgen. Anyqtalǵandaı, órt sóndirý kóligi shaqyrtýǵa bara jatqan. «Sergek» beınebaqylaý kameralaryndaǵy jazba zertteldi. Beınejazbadan órt sóndirý kóliginiń dabyl shamdary qosylyp turǵany kórindi. Tramvaı oǵan jol bermeı qoıǵan», - dep habarlady vedomstvo ókilderi.
Polıtsııa qyzmetkerleri men qutqarýshylar oqıǵa ornynda jumys isteýde. Zardap shekken eshkim joq. Jol erejesin buzǵan tramvaı júrgizýshisine qatysty ákimshilik hattama toltyryldy.
