Óskemende órt shyqqan kópqabatty úıden 40 adam evakýatsııalandy
ÓSKEMEN. QazAqparat – Óskemen qalasynda órtengen kópqabatty úıden 40 adam evakýatsııalandy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 23 jeltoqsan kúni saǵat 14.28-de Qazaqstan kóshesindegi 12 qabatty turǵyn úıde órt shyqqany týraly habar túsken. Oqıǵa ornyna kelip jetken órt sóndirýshiler elektr kabelin jáne 2-8 qabattar aralyǵyndaǵy elektr eseptegishterdi jalyn sharpyǵanyn kórdi.
«Qutqarýshylar kelgenshe elektr qýatyn ózdiginen óshirmek bolǵan 1988 jylǵy er adamnyń qolyn kúıik shaldy. Ol birden aýrýhanaǵa jetkizildi. Sondaı-aq 6 turǵyn, onyń ishinde 4 bala qutqarylǵan», - dep habarlady vedomstvo ókilderi.
Budan bólek, tútin tumshalaǵan podezden 40 adam evakýatsııalandy. Tilsiz jaýdy aýyzdyqtaýǵa jeke quramnan 35 adam men 9 tehnıka jumyldyrylǵan. Qazirgi ýaqytta órttiń shyǵý sebebi anyqtalyp jatyr.
