Óskemende órt shyqqan kópqabatty úıden 27 adam evakýatsııalandy
ÓSKEMEN. QazAqparat – Óskemen qalasynda órt shyqqan kópqabatty úıden 27 adam evakýatsııalandy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, sońǵy táýlikte óńir boıynsha 8 órt shyqqan.
«Óskemendegi Chehov kóshesinde ornalasqan kópqabatty turǵyn úıdiń 5-qabatyndaǵy páterde tońazytqysh órtendi. Oqıǵa ornyna shuǵyl jetken qutqarýshylar podezden 27 adamdy, onyń ishinde 3 balany evakýatsııalady. Órttiń shyǵýyna – tońazytqyshtyń apattyq rejımi sebep bolǵan», - delingen aqparatta.
Semeı qalasyndaǵy jer úıde edenniń aǵash qurylymdary, jeke zattar men jıhaz jandy. Tilsiz jaýdyń jalpy aýdany 20 sharshy metrdi quraǵan. Aldyn ala málimet boıynsha órttiń shyǵý sebebi – peshti ornatý jáne paıdalaný kezinde qaýipsizdik talaptarynyń saqtalmaýy.
«Úrjar aýdanyndaǵy sharýa qojalyǵynda 2 úıdiń shatyry, jıhaz, turmystyq tehnıka men jeke zattardy jalyn sharpyǵan. Ottyń jalpy aýdany 100 sharshy metrge jetti.
Sondaı-aqAltaı aýdanynda azyq-túlik dúkenine japsarlas salynǵan garajda 1997 jylǵy «Toyota Hiace» markaly avtokólik janǵan. Órttiń shyǵýyna – qaýiptiligi joǵary agregatpen abaısyz jumys atqarý sebep boldy. Dál osyndaı sebeppen Jarma aýdanyndaǵy tasjolda «KamAZ» órtendi», - delingen málimette.
