Óskemende órt shyqqan kópqabatty úıden 21 adam qutqaryldy
ÓSKEMEN. QazAqparat - Óskemende 9 qabatty úıdiń elektr symynan órt tutanyp, 21 adam qutqaryldy, dep habarlaıdy QazAqparat tilshisi QR ІІM Tótenshe jaǵdaılar komıtetiniń resmı ókili Nursultan Nurahmetovke silteme jasap.
«Búgin saǵat 15.22-de órtke qarsy qyzmet beketine Óskemen qalasynyń Krasın kóshesinde 9 qabatty úıden órt shyqqany týraly habar tústi. Kabel shahtasynda elektr symy úshinshi qabattan bastap toǵyzynshy qabatqa deıin janǵan. Qaýip tónýi múmkin delingen 21 adamnyń 20-sy baspaldaq arqyly syrtqa shyǵarylsa, bir adam altynshy qabattan órt sóndirý satysy arqyly qutqaryldy. Saǵat 16.08-de órttiń taralýy toqtatylyp, 16.27-de túgeldeı sóndirildi», - dedi resmı ókil.
Iis tıip ýlanǵan 62 jastaǵy áıeldi jedel járdem qyzmeti aýrýhanaǵa jetkizdi.
«Jalyn elektr qurylǵysyn órt qaýipsizdigin saqtamaı paıdalanýdan tutanýy múmkin», - delingen aqparatta.
Órtti óshirýge oblystyq tótenshe jaǵdaı qyzmetiniń jeke quramynan 25 adam jáne 8 tehnıka qatysqan.
