Óskemende órt shyqqan kópqabatty úıden 13 adam qutqaryldy
ÓSKEMEN. QazAqparat – Óskemen qalasynda kópqabatty turǵyn úıde órt shyqty, dep habarlaıdy QazAqparat tilshisi.
ShQO TJD baspasóz qyzmetiniń málimetine súıensek, búgin kópqabatty turǵyn úı podeziniń birinshi qabatynda ornalasqan moped pen jeke zattar órtengen. Oqıǵa ornyna dereý jetken órt sóndirýshiler turǵyndardy qutqarýǵa kiristi. Qaýipsiz jerge kóshirilgen 35 adamnyń ishinde 15 bala bar.
«Sondaı-aq baspaldaq arqyly 13 adam qutqaryldy. Onyń ishinde 7 bala men 2 múmkindigi shekteýli jan bolǵan. Tilsiz jaýdyń jalpy aýmaǵy 3 sharshy metrdi quraǵan. Órttiń shyǵý sebebi – otpen abaısyz áreket etýden bolýy múmkin», - dep habarlady vedomstvo ókilderi.
Osy rette, TJD turǵyndarǵa órt qaýipsizdigi erejelerin qatań saqtaý qajettigin eskertedi.
