Óskemende Oralhan Bókeı atyndaǵy respýblıkalyq baıqaý jeńimpazdary marapattaldy
O.Bókeı atyndaǵy ortalyqtandyrylǵan kitaphanada qazaqtyń klassık jazýshysynyń týǵan kúnine oraı «Aýyl hıkaıalary» atty tuńǵysh respýblıkalyq ádebı baıqaý ótti. Onyń uıymdastyrylýyna atalǵan kitaphana, qalalyq mádenıet jáne tilderdi damytý bólimi, Qazaqstan Jazýshylar odaǵynyń ShQO fılıaly muryndyq bolǵan.
«Baıqaýǵa Astana qalasy, Shyǵys Qazaqstan, Abaı, Aqtóbe, Pavlodar oblystarynan jas qalamgerler qatysty. Barlyǵy 30-dan astam shyǵarma kelip tústi. Ádilqazylar quramynda Oralhan Bókeıdiń jan dosy, rýhanı syrlasy Álibek Asqarov, jazýshy, «Qurmet» ordeniniń ıegeri Asqar Altaı, aqyn Álibek Qańtarbaı boldy», - deıdi kitaphana qyzmetkerleri.
Baıqaýdyń qorytyndysy boıynsha 1 oryn – «Aran» atty áńgimesimen Qýat Qıyqbaı (Abaı oblysy), 2 oryn – «Aqqumdaǵy hıkaıa», áńgimesimen Baqyt Jalıeva (Aqtóbe oblysy), 3 oryn – «Úkilegen úmit» áńgimesimen Aqıqat Sársembaev (Óskemen qalasy).
Aıta keteıik, Oralhan Bókeıdiń týǵan kúnine oraı ótken sharalar legi búgin JMK yqsham aýdanyndaǵy Oralhan eskertkishinen bastaldy. Jınalǵandar eskertkishke gúl shoqtaryn qoıyp, Altaıdyń «Kerbuǵysyn» eske aldy.
Sodan keıin olar Óskemendegi O.Bókeı atyndaǵy №44 mektepke baryp, qalamgerdiń mýzeıimen tanysty.
«Keıbir azamattar Oralhannyń eskertkishinde dúnıege kelgen kúnimen, qaıtqan kúnin jazý kerektigin aıtyp jatyr. Meniń oıymsha, jazylmaǵany durys. Óıtkeni Oralhan Altaıda tiri adam! Jazýshynyń shyǵarmalary ómirsheń», - deıdi jazýshy Asqar Altaı.
Keler jyly Muztaý muzbalaǵynyń 80 jyldyq mereıtoıy bolmaq.