Óskemende opyrylyp túsken Shnaıder kópiriniń ornyna jańasy qashan salynatyny belgisiz
ÓSKEMEN. KAZINFORM – Óskemen qalasynda jańa Shnaıder kópiriniń qurylysy ázirge bastalmaıdy. Jobany iske asyrý tergeý amaldary aıaqtalǵanǵa deıin keıinge shegerildi.
Ótken jyldyń qyrkúıek aıynda Shnaıder kópiri opyrylyp túsken bolatyn. Alǵashynda kópirdi jóndeý josparlanǵan. Alaıda júrgizilgen tehnıkalyq saraptama nátıjesinde mamandar kópirdi qalpyna keltirý tıimsiz degen qorytyndyǵa kelip, onyń ornyna jańa kópir salý týraly sheshim qabyldandy. Degenmen qurylys jumystarynyń naqty qashan bastalatyny ázirge belgisiz.
Óskemen qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń málimetinshe, kishi aınalma jol tusyndaǵy jańa Shnaıder kópiriniń qurylysy barlyq qajetti tergeý sharalary aıaqtalǵanǵa deıin keıinge qaldyrylǵan.
- Tergeý jumystary aıaqtalǵannan keıin jobany iske asyrýǵa qatysty túpkilikti sheshim qabyldanady, - delingen habarlamada.
Osylaısha, jańa kópir qurylysynyń naqty bastalý merzimi ázirge anyqtalǵan joq. Tergeý aıaqtalǵanǵa deıin joba ýaqytsha toqtatylyp otyr.
Eske salsaq, ShQO-da Shnaıder kópirindegi apattan keıin basqarma basshysy qyzmetinen ketkeni habarlanǵan.
