Óskemende óndiristik tseh órtendi
ÓSKEMEN. QazAqparat - Óskemenniń Tashkent kóshesindegi óndiris ǵımaraty órtendi, dep habarlaıdy QazAqparat tilshisi.
Túngi saǵat 22.00-de tutanǵan jalynmen órt sóndirýshiler 1,5 saǵat boıy arpalysqan.
«№4 jasaqtyń mamandary kelgen kezde aǵash tilikteri men óndiris qurylǵylary janyp jatty. Órt sóndirýshiler qoıý tútinniń ishinen «Gazel» markaly kólikti baıqap, der kezinde syrtqa shyǵarǵan. Ǵımarat ishinde aýa syǵymdalǵan tórt ballon bolypty. Órtpen kúresýshiler qyraǵylyq tanytpasa, órttiń sońy alapat jarylysqa aınalýy múmkin edi» - delingen Óskemen qalasynyń tótenshe jaǵdaılar basqarmasynyń baspasóz qyzmeti taratqan aqparatta.
Qyzyl jalyn 170 sharshy metr aýmaqty kúlge aınaldyrdy. Órt abaılamaýdan, elektrli qurylǵylarynyń aqaýy, qural-jabdyqty erejege saı qoldanbaýdan shyǵýy yqtımal degen úsh boljam aıtylýda. Bul ǵımaratta naqty qandaı óndiris bolǵany da ázirge belgisiz kúıinde qalyp otyr.
«Ǵımarattyń ishinde óndiristik tseh bolǵan. Alaıda munda ne óndirilgenin dóp basyp aıtý erte. Qujattary túsiniksiz. Órt qaldyqtaryna qarap, taqtaı tiletin sheberhana bolǵan deýge keledi. Onyń qanyq-qanyǵyn mamandardyń tekserýi aıtady» - deıdi qalalyq TJB baspasóz qyzmetiniń ókili Marına Lıskova.
