Óskemende ondaǵan jer úı jaryqsyz qystap shyqqan
ÓSKEMEN. QazAqparat - Óskemennniń irgesindegi №21 shaǵyn aýdanǵa ýaqytsha jaryq tartylady. Turǵyndarmen kezdesken oblys ákimi Danıal Ahmetov qala basshysyna sondaı tapsyrma berdi, dep habarlaıdy QazAqparat tilshisi.
Qaınaǵan qurylystyń janynda tursa da, №21 aýdandaǵy ondaǵan jer úı jaryqsyz qystap shyqqan. Jaǵdaıdy óz kózimen kórýge kelgen oblys ákimi Danıal Ahmetovke turǵyndar pushaıman kúılerin aıtyp, máseleniń sheshilýine yqpal etýdi ótindi. Bir jyl buryn dál osyndaı máselemen kórshiles №20 shaǵynaýdan turǵyndary da D. Ahmetovke shaǵymdanǵan bolatyn. Іske ákim aralasqan soń bıýdjetten qarjy bólinip, jyldar boıy generator paıdalanyp kelgen 500 úı ortalyqtandyrylǵan elektr jelisine qosylǵan. «Sondaı ıgilik bizge de buıyryp qalar» degen úmitpen kezdesýge №21 shaǵynaýdannyń turǵyndary taıly-tuıaǵy qalmaı jınalypty. Arasynda №20 aýdannyń toq jetpeı qalǵan tórt januıasy da bar.
-Byltyr bıýdjetten 120 mln teńge bólinip, 500-deı úıge jaryq tartyldy. Sol elektr shettegi tórt úıge jetpeı qalǵan. Endi barsaq, aqshasyn tóleńder degen shart qoıyp otyr. Memleket bólgen aqshany jetkize almasa, qalǵanyn sonda biz tóleýimiz kerek pe? Meniń ózim 798 telimde turamyn. Úsh adambyz. Eki qys qatarynan maı shammen qystap shyqtyq. Bizden basqalary ýaqytsha páter jaldap júr. Al bizdiń barar jer, basar taýymyz bolmaǵan soń, sham jaǵyp kúneltip kelemiz, - deıdi Sara Sádýaqasqyzy esimdi turǵyn.
№21 aýdannyń ekinshi qaptalynda da jeti birdeı úı bes jyldan beri generatordan jaryq alyp otyr. Sol ýaqyt aralyǵynda talaı basshynyń ýádesin alyp, talaı mekemeniń tabaldyryǵyn tozdyrypty. Aımaq basshysy ortaq ıgilikten shet qalǵan bul úılerdiń máselesin shuǵyl sheshýdi qala ákimi Jaqsylyq Omarǵa tapsyrdy. Al №21 shaǵynaýdandaǵy 37 úıdi ýaqytsha elektr qýatyna qosý úshin 12 mln teńge bólinetin boldy.
-Shahar basshysyna 1,5 aı ýaqyt berip otyrmyn. Birinshi mamyrǵa deıin jaryqsyz úılerdiń bárine elektr jalǵanady. Al aýdandy tolyq ınfraqurylymmen qamtý úshin bólek joba daıyndaýdy tapsyramyn, - dedi oblys ákimi.
№21 aýdanda 2008 jyldan beri 540 jer telimi berilgen. Turaqty jaryq pen sý júıesi joba daıyndalǵannan keıin ǵana tartyla bastaıdy. ıAǵnı, qazir baspanasyna kirip alǵan turǵyndar da sol jobany kútýi tıis. Ázirge olar sýdy jeke qudyqtan alýda.
Turǵyndar jol sapasy da syn kótermeıtinin aıtady. Keıbir sýaıryqtar sapasyz jasalǵandyqtan, jaýyndy kúnderi aýdanǵa tótenshe jaǵdaı ókilderi men jedel járdem kire almaı qalatyn kórinedi. Qala ákimi Jaqsylyq Omar jańadan salynyp jatqan aýdandardyń barlyǵynda osyndaı másele bar ekenin aıtyp, kezegi jetkende ol olqylyq ta joıylady degen ýádesin berdi.
