Óskemende oqýshy qyzdyń asylyp qalǵany jaıly aqparat – jalǵan
Osy aıdyń basynda Óskemende ájethanada oqýshy qyzdyń soqqyǵa jyǵylǵany jaıly vıdeo tarady. Polıtsııa bul oqıǵanyń naýryz aıynda bolǵanyn, qazirgi ýaqytta sotqa deıingi tergeý amaldary júrgizilip jatqanyn málim etken. Sondaı-aq kámelettik jasqa tolmaǵan balanyń bet-beınesi kórinip turǵan vıdeony taratqandarǵa da jaza qoldanylatyny habarlandy.
Al kesheli beri áleýmettik jelide zardap shekken oqýshynyń óz ózine qol jumsaǵany týraly habar jeldeı esip ketti. ShQO polıtsııa departamenti baspasóz qyzmetiniń málimetine súıensek, bul shyndyqqa janaspaıdy.
«Bul - jalǵan aqparat. Áleýmettik jelilerdi paıdalanýshylarǵa Qazaqstan Respýblıkasy Qylmystyq Kodeksiniń 274-baby 2-bóliginiń 3-tarmaǵyna sáıkes, buqaralyq aqparat quraldaryn nemese aqparattyq-kommýnıkatsııalyq jelilerdi paıdalana otyryp, kórineý jalǵan aqparat taratqandar 3 jylǵa deıin bas bostandyǵynan aıyrylatyndyǵyn eskertemiz», - delingen aqparatta.
