Óskemende oqýshy qyz shuńqyrǵa qulap ketti

ÓSKEMEN. QazAqparat – Óskemen qalasynda oqýshy qyz shuńqyrǵa qulap ketti, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, 30 qazan kúni saǵat 16.10-da Geologıcheskaıa kóshesiniń mańynda jasóspirim shuńqyrǵa qulap ketken. Oqıǵa ornyna qutqarýshylar shuǵyl kelip jetti.

«Mamandandyrylǵan jasaq qyzmetkerleri 15 jastaǵy qyzdy shuńqyrdan arqanmen alyp shyqty. Sodan keıin oqýshy jedel járdem dárigerlerine tapsyryldy», - dep habarlady vedomstvo ókilderi.

Departament mamandary óńir jurtshylyǵyna qaýipsizdik erejelerin saqtaý qajettigin eskertedi. Ata-analar qandaı jaǵdaı bolmasyn balalardy qaraýsyz qaldyrmaýy kerek.