Óskemende oqýshy polıtsııaǵa terrorıster jaıly jalǵan habar bergen

ÓSKEMEN. KAZINFORM – Óskemen qalasynda 8 jasar bala polıtsııaǵa terrorıster jaıly jalǵan habar bergen.

ShQO polıtsııa departamenti baspasóz qyzmetiniń málimetine súıensek, «102» jedel arnasyna qońyraý shalǵan oqýshy «Biz jaqqa terrorıster júr, tez kelińizder!» dep qaladaǵy mekenjaılardyń birin aıtqan.

«Sol jerge arnaıy qyzmetter shuǵyl kelip jetti. Alaıda bul jalǵan habar bolyp shyqty. Kóp uzamaı habarlasqan 8 jasar oqýshy ekendigi anyqtaldy. Óz sózinde ol kórshi úıde turatyn balanyń terrorıster jaıly aıtyp, polıtsııaǵa habar berýdi ótingenin jetkizdi», - delingen aqparatta.

Bul 14 jastaǵy jasóspirim bolyp shyqqan. Eki oqýshynyń ata-anasy da bala tárbıesindegi mindetterin oryndamaǵany úshin ákimshilik jaýapkershilikke tartyldy.